Redaktor seçimi

Video

  • “AbzasMedia”nın direktoru Ülvi Həsənli və baş redaktoru Sevinc Vaqifqızı haqqında həbs qətimkan tədbirinin müddəti uzadılıb

    “AbzasMedia” ilə bağlı cinayət işi üzrə həbsdə olan jurnalistlər – nəşrin direktoru Ülvi Həsənli və baş redaktoru Sevinc Abbasova (Vaqifqızı) haqqında istintaq dövrü üçün seçilmiş həbs qətimkan tədbirinin müddəti artırılıb. Martın 14-də Xətai Rayon Məhkəməsində bu barədə qərar çıxarılıb.

    Jurnalistlərin həbsdə saxlanma müddətinin artırılması üçün verilmiş hər iki təqdimata hakim Rəfael Sadıxov baxıb. Lakin məhkəmə prosesləri ayrı-ayrılıqda keçirilib.

    Həm Ülvi Həsənli, həm də Sevinc Vaqifqızı haqqında həbs qətimkan tədbirinin uzadılması üçün verilmiş təqdimatı məhkəmədə müstəntiq müdafiə edib. O bildirib ki, hələ istintaq davam edir, atılacaq addımlar var. Bu müddətdə onların azadlıqda qalması məqsədəuyğun deyil. Çünki azadlıqda qalsalar, istintaqdan yayınmaq, prosesin gedişinə təsir göstərmək ehtimalı var.

    Hər iki məhkəmə prosesində jurnalistlərin vəkilləri isə təqdimatın təmin olunmamasını istəyib. Vəkillər bildirib ki, istər Ülvi Həsənli, istərsə də Sevinc Vaqifqızı heç bir cinayət törətməyib, istintaq da indiyədək bununla bağlı sübut-dəlil ortaya qoymayıb. Onlar müvəkkillərinin əsassız həbsdə saxlandığını vurğulayaraq, hakimdən aylardır davam edən bu ədalətsizliyə son qoyulmasını istəyiblər.

    Təqsirləndirilən jurnalistlərin özləri də onlara verilən qaçaqmalçılıq ittihamının saxta olduğunu, “AbzasMedia”dakı korrupsiya araşdırmalarına görə cəzalandırıldıqlarını bildiriblər. Onlar məhkəmədən obyektivlik və ədalətli qərar gözləntilərinin olmadıqlarını da vurğulayıblar.

    Sevinc Vaqifqızının işinə baxanda onunla hakim Rəfael Sadıxov arasında mübahisə yaranıb. Jurnalist siyasi sifarişlə, hakimiyyətdəkilərin korrupsiyasını ifşa etdiklərinə görə cəzalandırıldığını deyəndə hakim onun sözünü kəsib. Bu yerdə Sevinc Vaqifqızı hakimə deyib:

    “Mənim sözümü kəsə bilməzsən. Nəinki sən, sənə göstəriş verənlər də kəsə bilməz. Səndən fərqli olaraq, mən azad insanam”.

    Məhkəmə proseslərinin sonunda Ülvi Həsənli barəsində həbs qətimkan tədbirinin müddəti daha 3 ay, Sevinc Vaqifqızı haqqında isə 2 ay 29 gün artırılıb.

    Vəkillər bildirib ki, bu qərarlardan apelyasiya şikayəti verəcəklər.

    Martın 7-də “AbzasMedia” ilə bağlı cinayət işi üzrə həbsdə olan jurnalistlərdən daha ikisi – Hafiz Babalı və Elnarə Qasımovanın da həbsdə saxlanma müddəti uzadılmışdı.

    Korrupsiya araşdırmalarıyla tanınan “AbzasMedia” işi üzrə həbslər noyabrın 20-dən başlayıb.

    Öncə saytın direktoru Ülvi Həsənli, direktor müavini Məhəmməd Kekalov, baş redaktoru Sevinc Vaqifqızı həbs edilib. Daha sonra həbslər araşdırmaçı jurnalist Hafiz Babalı, Nərgiz Absalamova və Elnarə Qasımova ilə davam edib. Onlar da Cinayət Məcəlləsinin 206.3.2-ci (bir qrup şəxs tərəfindən qaçaqmalçılıq) maddəsilə ittiham olunur.

    Bu maddənin sanksiyasında 5 ildən 8 ilə qədər azadlıqdan məhrumetmə cəzası nəzərdə tutulub.

    Noyabrın 20-də Ülvi Həsənli saxlandıqdan sonra “AbzasMedia”nın ofisində axtarış aparılıb. Saytın ofisindən 40 min avro pul tapıldığı iddia olunub.

    Ülvi Həsənli isə orada pul olmadığını, 40 min avronun ofisə onu tapdığını iddia edənlərin özləri tərəfindən qoyulduğunu bildirib.

    Adları çəkilən jurnalistlərin heç biri özünü təqsirli bilmir, “AbzasMedia”da Prezidentin ailə üzvləri də daxil olmaqla, bir sıra vəzifəli şəxslərin biznesi, korrupsiya ilə bağlı araşdırmalara görə cəzalandırıldıqlarını bildiriblər.

    “AbzasMedia”dan sonra “Kanal 13” internet televiziyasının rəhbəri Əziz Orucov və bu qurumun əməkdaşı Şamo Eminov da qaçaqmalçılıq ittihamıyla həbs olundu. Hazırda onların işi üzrə istintaq Səbail rayon Polis İdarəsində davam edir.

    Martın 6-da və 8-də isə “Toplum TV” kanalının və III Respublika Platformasının bir qrup əməkdaşı eyni ittihamla həbs edilib.

    III Respublika Platformasının ofisindən və “Toplum TV”-nin əməkdaşlarının evindən axtarış zamanı müxtəlif məbləğlərdə pul tapıldığı iddia olunur.

    Onlar isə bu ittihamı rədd edir, tapıldığı iddia edilən pulların evlərə və ofisə axtarışı aparan polislərin özləri tərəfindən qoyulduğunu deyirlər.



  • “Toplum TV”-nin baş redaktoru Xədicə İsmayılova martın 14-də Bakı Şəhər Baş Polis İdarəsində dindirilib. “Toplum TV” ilə bağlı cinayət işi üzrə şahid qismində istintaqa cəlb olunan Xədicə İsmayılova 3 saata yaxın idarədə olsa da, ətraflı ifadə verməyib. Onun sözlərinə görə, dindirmə zamanı qərəzli münasibət hiss etdiyinə görə Konstitusiya və qanunların ona verdiyi susmaq hüququndan istifadə etmək qərarına gəlib.

    Konstitusiyanın 66-cı maddəsində yazılıb ki, “heç kəs özünə və yaxın qohumlarına qarşı ifadə verməyə məcbur edilə bilməz”.

    Eyni zamanda, Cinayət-Prosessual Məcəllənin 227-ci maddəsində göstərilib ki, müstəntiq dindirmə zamanı şahidə mütləq özünün və ya yaxın qohumlarının əleyhinə ifadə verməyə borclu olmadığı barədə məlumat verməlidir.

    İstintaq orqanının qərəzli olduğunu hiss elədim. Verəcəyim ifadənin sonradan mənim əleyhimə istifadə olunmayacağına əmin deyiləm. Bu səbəbdən konstitusion hüququmdan istifadə etdim”, – Xədicə İsmayıl bildirib.

    O, əlavə edib ki, prosedur məsələlərlə əlaqədar müstəntiqlə aralarında fikir ayrılıqları olub. Bu mübahisə də bir qədər çəkdiyinə görə idarədə 3 saata yaxın qalıb.

    Xədicə İsmayıl yenidən istintaqa çağırılıb-çağırılmayacağını bilmir. Deyir ki, ona bu barədə məlumat verilməyib.

    Baş redaktor əlavə edib ki, “Toplum TV” ilə bağlı cinayət işi də, bu cinayət işi əsasında həyata keçirilən həbslər də əsassızdır:

    “Toplum TV”-nin cinayət işinə əsas olacaq fəaliyyəti olmayıb”.

    Xədicə İsmayıl vurğulayıb ki, “Toplum TV”-nin timsalında media orqanının ofisini möhürləmək dövlət adına ayıbdır.


    “Toplum TV”-nin baş redaktoru Xədicə İsmayılova martın 14-də Bakı Şəhər Baş Polis İdarəsinə dəvət edilib. Bu barədə jurnalist özü məlumat verib.

    “Bu gün saat 15:00-da məni gözləyirlər” – deyə, o “Facebook” hesabında yazıb.

    Martın 6-da polis “Toplum TV”-nin ofisinə basqın edib, ofislə yanaşı saytın bir neçə əməkdaşının evində, o cümlədən III Respublika Platformasının ofisində axtarış aparılıb. Ofisdən 30 min avro, əməkdaşların evlərindən isə 2700, 3100, 20000 avro pul vəsaiti tapıldığı bildirilib.

    Saxlanılanlardan Akif Qurbanova, Fərid İsmayılova, Müşfiq Cabbara, Əli Zeynala, Ramil Babayevə, Elmir Abbasova və İlkin Əmrahova 206.3.2 (qaçaqmalçılıq) ittihamı ilə cinayət işi açılıb.

    Martın 8-də isə hüquqşünas, “Toplum TV”-nin təsisçilərindən olan Ələsgər Məmmədli mülki geyimlilər tərəfindən “İstanbul” Klinikasının önündə saxlanılıb. Həmin gün polis III Respublika Platformasının Qurucu Heyətinin üzvü Ruslan İzzətlini də saxlayıb. Hər ikisinin evində axtarış aparılıb. Ələsgər Məmmədlinin evindən 7300 dollar tapıldığı iddia edilib.

    Ruslan İzzətlinin həyat yoldaşı Günel Manaflı onların evindən də “pul tapıldığını” qeyd edib. Bu işlə bağlı saxlanılanlardan Ələsgər Məmmədli (“Toplum TV”-nin təsisçisi), Müşfiq Cabbar (“Toplum TV”), Akif Qurbanov (III Respublika Platforması), Ruslan İzzətli (III Respublika Platforması), Ramil Babayev (Demokratik Təşəbbüslər İnstitutu), İlkin Əmrahov (Demokratik Təşəbbüslər İnstitutu), Əli Zeynala (Demokratik Təşəbbüslər İnstitutu) Cinayət Məcəlləsinin 206.3.2 (qaçaqmalçılıq – qabaqcadan əlbir olan bir qrup şəxs tərəfindən törədildikdə) maddəsi ilə ittiham irəli sürülüb. Özləri ittihamı qurama sayırlar.

  • “Avtomobillər Britaniyadan Azərbaycana, Azərbaycandan isə Rusiyaya ixrac olunur”

    Rusiyaya qarşı Qərb sanksiyalarına baxmayaraq Britaniya istehsalı olan bahalı avtomobillər üçüncü ölkələr vasitəsilə Rusiyaya çatdırılır.

    Britaniyanın “SkyNews” telekanalının saytında dərc olunmuş xəbərdə deyilir ki, Ukraynaya hərbi müdaxiləsindən və sanksiyaların tətbiqindən sonra Britaniya avtomobil istehsalçıları artıq Rusiyaya avtomobil satmırlar.

    Ən azından iddia etdikləri budur. İkili istifadə sanksiyaları adlanan rejim çərçivəsində Rusiyaya idxalı qadağan edilən əşyalar arasında avtomobillər də var.

    Dəyəri 42 min funt sterlinqdən yuxarı olan lüks avtomobillərin Rusiyaya satışına xüsusi qadağa qoyulub.

    Bununla yanaşı, postsovet məkanının digər ölkələrinə avtomobil ixracı kəskin şəkildə artıb.

    Bu ölkələrdən biri də Azərbaycandır.

    10 milyon əhalisi olan və ümumi daxili məhsulu Qananın ümumi daxili məhsuluna uyğun gələn bir ölkə bir neçə ilin içində Avstriya, Portuqaliya və İsveçi qabaqlayaraq, dəyər baxımından Britaniyanın 16-cı ən böyük avtomobil ixracatçısına çevrilib.

    Britaniyanın Vergi və Gömrük Rüsumları İdarəsinin (HMRC) rəsmi məlumatlarına görə, bu ölkə 2023-cü ildə Azərbaycana 273 milyon funt sterlinq dəyərində avtomobil ixrac edib ki, bu da Rusiyanın Ukraynaya təcavüzündən əvvəlki 5 illik dövrlə müqayisədə 1860% artım deməkdir.

    Satılan avtomobillərin sayını və ümumi dəyəri də göstərən HMRC məlumat bazasında qeyd olunur ki, Azərbaycana ixrac edilən Britaniya avtomobillərinin orta dəyəri 100 min funt sterlinqdən çox olub.

    Bu, idxalın əsasən və ya eksklüziv olaraq lüks avtomobillər olduğunu göstərir.

    Azərbaycana ixracın artımı nəinki görünməmiş, həm də miqyasına görə sanksiyalardan əvvəlki iki ildə Rusiyaya illik avtomobil ixracı ilə müqayisə edilə bilər ki, bu da orta hesabla 330 milyon funt-sterlinqdir.

    Britaniyanın HMRC statistikasına əlavə olaraq “Sky News” BMT-nin beynəlxalq ticarət məlumatlarını təhlil edib.

    Məlum olub ki, avtomobillərin Britaniyadan Azərbaycana, Azərbaycandan isə Rusiyaya ixracı sıçrayışla artıb.

    “Sky News”a verilən məlumatlara görə, Britaniyadan Azərbaycana yüklərin daşınması üçün ən çox istifadə edilən liman “Bristol” olub ki, bu liman daha əvvəl heç vaxt bir il ərzində ölkəyə bir neçə milyon funt-sterlinq dəyərində mal ixrac etməyib.

    Ukraynada müharibə başlyandan sonra iki il ərzində ixrac ildə 100 milyon funt sterlinqə yüksəlib.

    Britaniya avtomobil istehsalçıları bütün sanksiyalara əməl etdiklərini təkid edilər.

    Lakin ekspertlər üçüncü ölkələr vasitəsilə Rusiyaya daxil olan malların axınını izləməyin faktiki olaraq mümkün olmadığını deyirlər.

    Nəşr yazır ki, Almaniya istehsalı avtomobillər Rusiyaya Qırğızıstan vasitəsilə çatdırılır.

    Londondakı “Royal United Services İnstitutu”nun (RUSI) Maliyyə Cinayətləri Mərkəzinin direktoru Tom Kitinq deyir ki, Azərbaycan, Ermənistan və Rusiya arasında sıx iqtisadi bağların olması aşkardır və bu səbəbdən də bu əraziyə çatdırılan avtomobilin son mənzilini aşkar etmək olmur:

    Amma avtomobil ixracına gəldikdə özünə belə bir sual verməlisən: “Mən düşünmürəm ki, birdən-birə ortalığa çıxan bu ixracatçı 100 avtomobil alırsa, onları üçüncü bir ölkəyə ixrac etməyəcək. Yoxsa onun əsl məqsədi sanksiyalardan yan keçib Rusiyaya maşın satmaqdır?”.

    Bugünlərdə Litva kəşfiyyat xidmətləri Rusiyaya qarşı sanksiyalardan yayınmağa kömək edən şirkətlər aşkarlayıblar.

    Bu şirkətlərin çoxu anbar, nəqliyyat və gömrük xidmətləri göstərir. Xüsusilə, onlar Rusiyaya nəqliyyat sektoru üçün komponentlərin, metal emalı və laboratoriya avadanlıqlarının, elektronika, mikroelektronika və komponentlərin, eləcə də hərbi məhsulların ixracına kömək edir.

    Finlandiyada isə Fransa vətəndaşı Qabriel Temini ixrac məhdudiyyətlərini pozduğuna görə 9 aylıq şərti həbs cəzasına məhkum edilib.

    Temin beynəlxalq daşımalar və anbarlarla məşğul olan Finlandiyanın “Luminor” və “Siberica” şirkətlərinin baş direktorudur.

    İş adamı 2023-cü ilin sentyabrında həbs edilib.

    İttiham tərəfinin fikrincə, onun şirkətləri sanksiyalardan yayınaraq Rusiyaya müxtəlif məhsullar göndərib.

    Rusiya 2022-cil fevralın 24-də Ukraynaya qarşı müharibəyə başlayıb.

    Bundan sonra Avropa Birliyi ölkələri, eləcə də ABŞ Rusiyaya qarşı sanksiyalar tətbiq edib.

Siyasət

Bölgə

Sosial

Fikrimcə

Araşdırma

Sağlıq

Mədəniyyət